由Netmarble網石遊戲代理【石器時代:世界】終於上架喇！本作除咗完美繼承電腦玩法之外，更加入唔少玩法令各位訓獸師體驗時更添唔少樂趣！遊戲中包含過百種寵物等你發崛／強化社群玩法（好似結婚／家族／活動等等）／回合制策略戰鬥，呢一切令試玩嘅小編玩到停唔到手！

呢次Lvup小編有幸獲邀率先體驗遊戲內容，玩之餘當然要大家了解今次作品有咩特點啦，未入Game 嘅馴獸師不妨先睇睇呢次新作介紹，做好準備再拎起手機勇闖衛尼斯大陸喇！

遊戲之中共有８款唔同武器俾玩家選擇～(飛斧、迴旋鏢、弓、投石、斧頭、棍棒、爪、槍)，每種武器都各有特色，就好似近距離/遠距離攻擊、單獨攻擊/群體攻擊、攻擊/防禦/抵抗/治療多個唔同效果。而且戰鬥時系統會根據訓獸師所用嘅武器，位置上亦會隨之改變，選擇最合適武器起手可以講係每位馴獸師首個重要任務！

本作特色
石器時代：世界最大特點就係【勁多】寵物大陸之中等住各馴獸師！種類方面亦非常多，寵物自身除左自帶四種元素屬性外亦有唔同類型，令遊戲戰鬥面有著更多唔同組合變化，PVP時更加需要考慮到戰術運用佈署，耐玩性從而大大提高。

收錄寵物
大陸存在各式各樣寵物等住大家發崛，據官方所講有成２百幾種寵物登場！而且大部份曾經係電腦版出現過！相信有玩過石器時代電腦版嘅粉絲見到舊拍檔一定Ｖｅｒｙ感動！

連機械獸都可以遇到!!

捕捉系統
而捕捉系統方面亦都好有趣，除咗要將寵物血量扣減一定程度之外，仲要留意寵物係咪已經有逃走意向，配合各種捕捉技能提昇成功率係捉寵環節中重要一環！過程中更有高能捉到高成長率版本，不斷提昇捕捉經驗就可以更有效刷新到最強寵物～

戰鬥玩法
開始前可以先進行寵物編組，考慮最佳陣形應付每場挑戰係每位馴獸師必做環節！
正式戰鬥亦保留原著特色，採用回合制攻防式玩法～每個回合結束時都可以拎到一定能量點數，而點數方面亦係使用技能成本，資源控制亦要落足心思運用，此外屬性相剋都係一個戰鬥重要因素，留意敵方隊伍屬性編成，鎖定進攻有利目標先係致勝關鍵玩法，小編都係玩左一排先大約知道戰鬥法則！

組隊挑戰，合作攻略
除左單人戰鬥之後，小編最愛就係多人小隊模式，組隊後每位玩家可帶一隻寵物，組成5人一組嘅攻略小隊，根據每位玩家武器職業以及寵物為戰鬥帶嚟唔同變化，如果真係組唔到其他人亦唔需要煩！本作有【傭兵系統】俾玩家選擇，作為隊長嘅你最多可以招募2名傭兵即時助戰，能力方面亦會根據花費貨幣而有所不同(當然愈高愈勁啦)，就好似真人助戰一樣絕對可以令你勝率大幅提昇。

完善社交系統
當年相信大家係電腦版本中唔多唔少都會識到【另一半】架啦!!今次遊戲就為大家準備咗最完善嘅結婚系統，等你哋遊戲之中都可以享隆重婚禮！以小編所知，結婚之後仲有專屬夫妻任務，可以拎到珍貴嘅成長材料，單身嘅小編依家仲係大陸入面搵緊命中另一半（哭）

組成屬於你嘅強大部落
本作中你仲可以帶領著你嘅部落/家族（公會）進行各種唔同活動，就好似【阻擋加美攻擊】！透過各種唔同玩法去擊退加美，成功之後仲會根據最後攻擊排名拎到各種唔同獎勵，而且更可以進行烤肉派對，會提供部落成員經驗值、肉，以及成員間互相贈送幸運包(lucky bags)，咁多種有趣玩法令小編玩到依家都仲未停到手！

整體總結
嚟到最後尾聲，依家同大家總結下隻Game有咩優缺點！
優點：
✔石器時代感動之作（Fans更加要試）
✔豐富寵物育成玩法
✔風格可愛清新
✔策略回合戰鬥玩法
✔強大社交玩法

缺點：
✘長時間遊玩會過熱
✘遊戲畫質不是太好
✘打擊感不強勁
✘需要在線時間較長

根據以上文章說明小編覺得呢隻遊戲係絕對可以一試，有完善收集育成元素以及社交互動玩法，就算唔係呢隻Game 既粉絲都可以玩玩~
唔講咁多啦，小編衣家忙緊遊戲中搵另一半，有望石器世界入面可以再見到咁多位Lvup 粉絲喇～