凜冬嘅極致視覺震撼

「Winter is coming！」當《權力遊戲》（Game of Thrones）嗰首刻入 DNA 嘅經典BGM一響起，相信一班 Fans 已經醒晒。由 Netmarble 開發嘅全新開放世界動作 RPG《權力遊戲：國王大道》，將劇中寫實又殘酷嘅中世紀奇幻世界高水準還原。

有 Unreal Engine 5 頂級畫質加持，壯觀嘅地貌盡收眼底——無論係被白雪覆蓋嘅村落、高聳入雲嘅北境絕壁，定係極具標誌性嘅絕美魚梁木，都展現出極致嘅場景風格同人設。

代入感滿分嘅北境故事

遊戲一開波就直接將玩家拉到極具壓迫感嘅「長城」之外。作為守夜人嘅一員，我哋首個任務就要面對白鬼同埋野人嘅猛烈攻擊！

畫面上風雪交加，完美營造出塞外寒冬嗰種絕望同冰冷感。最令人興奮嘅係，序章已經見到大家最熟悉嘅 Jon Snow（瓊恩·雪諾）同我哋並肩作戰！強大嘅敘事張力加埋電影級分鏡，令呢個原創故事嘅序章極度吸引，代入感直接拉滿。

職業系統：化身刺客展現「水之舞」

遊戲暫時提供三大職業畀玩家揀：傭兵、騎士同埋暗殺者。每個職業嘅戰鬥風格都好唔同，小編今次當然係私心揀咗「暗殺者」啦！揮舞住靈動嘅刺劍，好似 Arya Stark（艾莉亞）嗰套靈巧致命嘅劍法咁，喺戰場上穿梭自如，打擊感非常出色，絕對係追求速度感玩家嘅首選。

戰鬥部份：告別無腦自動，考驗操作嘅硬核動作

戰鬥系統絕對係本作嘅最大賣點！有別於市面上一鍵全自動嘅「免洗手遊」，呢隻驚極度講求操作技術。普攻、強攻擊、連技、主副武器技能再加迴避，成套 Combo 打落非常流暢。

遊戲仲加入咗好有深度嘅反擊同閃避機制：當敵人著「橙光」嗰陣，玩家要精準進行格檔反擊；而著「紅光」就要準備迴避。除此之外，玩家唔單止可以正面應戰，仲可以玩「隱密作戰」，潛伏喺敵人視線死角背後突襲，逐個擊破。配合多樣化嘅技能同自由度極高嘅「特性樹」嚟強化角色能力，令每一場戰鬥都充滿策略性。

遊戲模式：大世界探索與多人激戰副本

除咗沉浸感極強嘅主線任務，《權力遊戲：國王大道》嘅大世界入面仲散落住唔同嘅村落同營地。唔單止可以推主線，透過解各地嘅豐富支線任務，玩家可以更深入理解當地嘅人同事，仲可以體驗埋「管理營地」嘅經營元素。

重點嚟喇！如果你鍾意同朋友一齊打怪，遊戲仲特別加入咗多人連線元素。玩家可以透過副本系統同其他玩家組隊，一齊挑戰強力嘅巨型怪物！從畫面可見，面對好似「赤紅雞蛇」呢類極具壓迫感嘅巨大 Boss，走位同團隊配合變得非常重要，絕對係考驗大家實力同連招技術嘅好地方，大大增加咗遊戲嘅挑戰性同耐玩度！

忠於原著嘅寫實美學

值得一讚嘅係遊戲嘅外觀部份。放棄咗浮誇嘅發光翅膀或者唔真實嘅奇幻裝備，本作堅持高度寫實嘅風格。各地士兵嘅衫、布料嘅紋理，以至角色嘅專屬服飾，都充滿中世紀嘅真實感同厚重感，完美契合《權力遊戲》嘅黑暗基調。

粉絲絕對唔可以錯過嘅權力遊戲世界

總結嚟講，《權力遊戲：國王大道》喺戰鬥玩法上交出咗極具誠意嘅答卷，佢絕對唔係一隻普通嘅自動戰鬥遊戲，而係真正刺激、考技術嘅動作大作。

頂級嘅大世界體驗加埋一流嘅故事沉浸感，如果你係《權力遊戲》IP 嘅死忠 Fans，絕對會即刻投入到呢個殘酷又美麗嘅世界入面，真正感受到維斯特洛大陸嘅魅力。小編而家已經等唔切，好期待未來隨住遊戲更新，有親自走到 King’s Landing（君臨城）嘅一日！

《權力遊戲：國王大道》PC版搶先遊玩已於5月14日登場，支援手機平台的全球正式上市預定於5月21日，請所有玩家與粉絲敬請期待。

《權力遊戲：國王大道》官方網站：https://gotkingsroad.netmarble.com/tc

《權力遊戲：國王大道》官方FB：https://www.facebook.com/GotKingsroad.TC

下載連結：https://store.steampowered.com/app/4214820/_/?l=tchinese