Netmarble 早前喺韓國舉辦嘅媒體發表會，正式公布以《七騎士》為基礎打造嘅放置類型手機遊戲《放置七騎士》。今次非常榮幸收到率先試玩嘅邀請，就等小編同大家一齊試試遊戲嘅各種玩法同系統啦。

遊戲開始經過短暫嘅劇情交代好快已經進入戰鬥部份，《放置七騎士》嘅基本系統係放置類型玩法。玩家唔需要過多嘅操作英雄們都會自動進行戰鬥，大地圖2.5D嘅呈現方式頗有心思，睇住班可愛嘅角色同怪物戰鬥感覺相當治癒。

遊戲英雄方面有好多熟識嘅臉孔，有玩過七騎士系列嘅朋友都可以發現到前作嘅英雄都以不同嘅面貌再次登場。角色立繪保持一貫嘅風格而戰鬥時英雄會變成Q版角色同boss展開戰鬥，透過自己獲得嘅英雄組成隊伍挑戰關卡，然後就可以不斷挑戰後面嘅關卡。另外透過每日料理獲得各種加成都係通過難關嘅其中一種辦法！

透過任務大量放送嘅英雄召喚券就可以喺「英雄召喚」裡面獲得唔同嘅英雄，數量非常多唔需要擔心抽唔到自己想要嘅英雄，而且打開掛機獲得嘅寶箱都可以拎到大量英雄，令史詩英雄前期可以輕鬆升階成為作戰部隊嘅主力。每個英雄技能各有特色，對付唔同類型嘅boss都需要動動腦筋編排能夠剋制嘅英雄出場。

此外，遊戲裡面仲有每日副本同決鬥場嘅玩法，不斷挑戰更高難度嘅每日副本可以拎到更多嘅升級素材，而決鬥場係一個同其他玩家進行10對10 PVP嘅玩法。每個英雄分別有坦克、輸出、輔助的職位，點樣去進行英雄編隊同隊伍位置絕對係勝負嘅關鍵。大家都可以嘗試搭配唔同嘅英雄技能進行組隊，可以體驗到充滿策略性戰鬥。

總結體驗嘅玩後感想，《放置七騎士》係一款令人玩得非常舒服嘅放置遊戲，簡易嘅操作、精簡嘅英雄技能都令小編非常容易上手遊戲，前期嘅指引任務非常多，唔經唔覺就玩咗一個下午，非常適合一邊工作一邊遊玩(笑)，期待《放置七騎士》正式推出，對本作感興趣嘅玩家請繼續關注後續報導。